ന്യൂഡൽഹി: കാലടി സർവകലാശാലയിലെ പരീക്ഷാ വിവാദവുമായി ബന്ധപ്പെട്ട് സസ്പെൻഷനിലായ വിദ്യാർഥികൾക്ക് സുപ്രീംകോടതിയിൽ നിന്ന് തിരിച്ചടി. കേസിൽ ഇടപെടാൻ വിസമ്മതിച്ച സുപ്രീം കോടതി കേസ് ഹൈക്കോടതിക്ക് തിരിച്ചയച്ചു.
ഹൈക്കോടതി സിംഗിൾ ബെഞ്ചിനോട് കേസിൽ ഉടൻ വാദം കേൾക്കാനും സുപ്രീംകോടതി നിർദേശം നൽകി. തീരുമാനം അവർക്ക് അനുകൂലമെങ്കിൽ പ്രത്യേക പരീക്ഷ നടത്താനും കോടതി നിർദേശിച്ചു. ഉത്തരവ് അനുകൂലമെങ്കിൽ സർവകലാശാല നടപടി വിദ്യാർഥികളുടെ താത്പര്യത്തെ ബാധിക്കുന്നില്ലെന്ന് ഉറപ്പാക്കണമെന്നും ജഡ്ജിമാരായ പി.എം. നരസിംഹ, അലോക് ആരാധെ എന്നിവരുടെ ബെഞ്ച് വ്യക്തമാക്കി.
സര്‍വകലാശാലകളില്‍ പാലിക്കേണ്ട അച്ചടക്കമുണ്ടെന്നും കോടതി ചൂണ്ടിക്കാട്ടി. വിദ്യാർഥികൾക്കായി മുതിർന്ന അഭി ഭാഷകൻ പി.വി. ദിനേശ് ആണ് ഹാജരായത്. സസ്പെൻഷൻ വഴിയാണ് അറ്റൻഡസ് കുറഞ്ഞതെന്നും സർവകലാശാല മനപൂർവം ഉണ്ടാക്കിയ സാഹചര്യമാണെന്നും അഭിഭാഷകൻ വാദിച്ചു. എന്നാൽ അറ്റൻഡൻസ് കോടതി പരിശോധിക്കണമെന്ന് സർവകലാശാലയും പറഞ്ഞു.
ഹൈക്കോടതി ഡിവിഷന്‍ ബെഞ്ച് ഉത്തരവിനെതിരെയായിരുന്നു വിദ്യാര്‍ഥികള്‍ സുപ്രീംകോടതിയെ സമീപിച്ചത്. ഫീസ് സ്വീകരിച്ച് പരീക്ഷ എഴുതാന്‍ അനുവദിക്കണം എന്നായിരുന്നു ആവശ്യം.
പരീക്ഷ തുടങ്ങിയ സാഹചര്യത്തിൽ ഹർജി അടിയന്തരമായി പരിഗണിക്കണമെന്ന് ഇന്നലെ വിദ്യാർഥികൾ ആവശ്യപ്പെട്ടെങ്കിലും ചീഫ് ജസ്റ്റീസ് സൂര്യകാന്ത് അധ്യക്ഷനായ ബെഞ്ച് ഇത് അനുവദിച്ചിരുന്നില്ല.
നേരത്തേ, വിദ്യാർഥികൾക്കു പരീക്ഷയെഴുതാൻ ഹൈക്കോടതി സിംഗിൾ ബെഞ്ച് അനുമതി നൽകിയിരുന്നെങ്കിലും ഡിവിഷൻ ബെഞ്ച് ഇത് റദ്ദാക്കുകയായിരുന്നു. ചട്ടവിരുദ്ധമായി തീരുമാനമെടുക്കാൻ സർവകലാശാലയോടു നിർദേശിക്കാൻ കോടതികൾക്കാകില്ലെന്നു ചൂണ്ടിക്കാട്ടിയാണ് ഡിവിഷൻ ബെഞ്ച് ഉത്തരവിട്ടത്. ഇതിനെതിരേയാണു 16 വിദ്യാർഥികൾ സുപ്രീംകോടതിയെ സമീപിച്ചത്.
‘ഷൂ നക്കാനും മാപ്പ് എഴുതാനും ഞങ്ങള്‍ സവര്‍ക്കറല്ല’: മന്ത്രി റോജി എം. ജോണിനെതിരെ പ്രതിഷേധം
കൊച്ചി: കാലടി ആദിശങ്കര ബിഎഡ് ട്രെയിനിംഗ് കോളജില്‍ എത്തിയ മന്ത്രി റോജി എം. ജോണിനെതിരെ പ്രതിഷേധം. കാലടി സംസ്‌കൃത സര്‍വകലാശാലയില്‍ സസ്പെന്ഷനിലായ വിദ്യാര്‍ഥികള്‍ മാപ്പ് എഴുതി നല്‍കിയാല്‍ തിരിച്ചെടുക്കാമെന്നും പരീക്ഷ എഴുതാന്‍ സൗകര്യമൊരുക്കാമെന്നും മന്ത്രി പറഞ്ഞതിനെതിരെയാണ് എസ്എഫ്‌ഐയുടെ പ്രതിഷേധം.
ഷൂ നക്കാനും മാപ്പ് എഴുതാനും ഞങ്ങള്‍ സവര്‍ക്കറല്ല എന്ന വലിയ ബാനര്‍ ഉയര്‍ത്തിയാണ് പ്രതിഷേധം. കോളജിലെ യൂണിയന്‍ ഉദ്ഘാടന പരിപാടിക്കായാണ് മന്ത്രി എത്തിയത്.
അതേസമയം, കാലടി സര്‍വകലാശാലയില്‍ നടന്ന ലൈറ്റ് മരിച്ചേ എന്ന നാടകം വിസി സിസ തോമസിന്‍റെ പ്രതീകാത്മക ശവസംസ്‌കാരമാണെന്നും സമരം അപരിഷ്‌കൃതമാണെന്നും പ്രതികരിച്ച മന്ത്രിക്കെതിരെ നേരത്തെ പ്രതിഷേധങ്ങള്‍ ഉയര്‍ന്നിരുന്നു. മന്ത്രിക്കെതിരെ മഹാരാജാസ് കോളജിലും പ്രതിഷേധം നടന്നിരുന്നു.
സുപ്രീം കോടതി വിധിയില്‍ ആശ്വാസമെന്ന് വിദ്യാര്‍ഥികള്‍
കൊച്ചി: കാലടി സര്‍വകലാശാലയിലെ പരീക്ഷാ വിവാദം ഹൈക്കോടതി സിംഗിള്‍ ബെഞ്ച് തന്നെ പരിഗണിക്കട്ടെയെന്ന സുപ്രീം കോടതി വിധിയില്‍ ആശ്വാസമെന്ന് വിദ്യാര്‍ഥികള്‍. സിംഗിള്‍ ബെഞ്ച് ഹര്‍ജി വീണ്ടും പരിഗണിക്കുമ്പോള്‍ പരീക്ഷയെഴുതാന്‍ അനുവദിക്കുമെന്നാണ് വിശ്വാസമെന്ന് സര്‍വകലാശാലയില്‍ നിരാഹാരം തുടരുന്ന വിദ്യാര്‍ഥികള്‍ മാധ്യമങ്ങളോട് പ്രതികരിച്ചു.
വിധി ആശ്വാസകരമാണ്. പരീക്ഷ എഴുതിക്കില്ല എന്ന സര്‍വകലാശാലയുടെ തീരുമാനത്തിന് എതിരായി വീണ്ടും സിംഗിള്‍ ബെഞ്ച് ഈ വിഷയം പരിഗണിക്കുന്നുവെന്ന് പറയുന്നത് വിദ്യാര്‍ഥികളെ സംബന്ധിച്ച് ഏറെ ആശ്വാസകരവും പ്രതീക്ഷയും നല്‍കുന്ന വിധിയാണ്.
ഞങ്ങള്‍ വളരെ പ്രതീക്ഷയിലാണ്. സിംഗിള്‍ ബെഞ്ച് പരിഗണിക്കുമ്പോള്‍ മുഴുവന്‍ വിദ്യാര്‍ഥികളെയും പരീക്ഷയെഴുതാന്‍ അനുവദിക്കും എന്ന് തന്നെയാണ് വിശ്വാസമെന്ന് വിദ്യാര്‍ഥികള്‍ പറഞ്ഞു. കൂടാതെ സസ്‌പെന്‍ഷന്‍ നിരുപാധികമായി പിന്‍വലിക്കുന്നത് വരെ സമരം തുടരുമെന്നും വിദ്യാര്‍ഥികള്‍ വ്യക്തമാക്കി.
അതേസമയം, വിസി സിസ തോമസിനെതിരായ പ്രതിഷേധത്തിന്‍റെ പേരില്‍ സസ്പെന്ഷനിലായ 10 വിദ്യാര്‍ഥികള്‍ക്ക് സെമസ്റ്റര്‍ പരീക്ഷ എഴുതാന്‍ ഹൈക്കോടതി സിംഗിള്‍ ബെഞ്ച് നേരത്തെ അനുമതി നല്‍കിയിരുന്നു. എന്നാല്‍ ഹാജര്‍ നില അടക്കം ചൂണ്ടിക്കാട്ടി ഡിവിഷന്‍ ബെഞ്ച് ഉത്തരവ് റദ്ദാക്കുകയായിരുന്നു.
ഇതിനെതിരെയാണ് വിദ്യാര്‍ഥികള്‍ സുപ്രീം കോടതിയെ സമീപിച്ചത്. ആവശ്യമായ ഹാജര്‍ നില ഉണ്ടെന്നും സസ്പെന്‍ഷനില്‍ ആയ സമയത്തെ ഹാജര്‍ മാത്രമാണ് ഇല്ലാതെ പോയതെന്നുമാണ് വിദ്യാര്‍ഥികളുടെ വാദം. വിദ്യാര്‍ഥികളില്‍ ഭൂരിപക്ഷം പേരുടെയും പരീക്ഷ ഇന്നലെ ആരംഭിച്ചിരുന്നു.
